‘Aho 9 ‘Epeleli 2020
Ngaahi Mātu’a ‘o e ‘Apiako Sutton Park
‘Oku ou ‘amanaki pē ‘oku mou mo’ui lelei pea tokamālie ‘a e ngaahi fatongia mei ‘api na. Koe ngaahi me’a ‘eni ‘oku toe tānaki atu ki he fanongongo koia na’e ‘osi fakahā atu ki mu’a.
Ko e uike faka’osi ‘eni ‘o e tutukú pea ‘e kamata ‘a e teemi hono 2 ‘i he ‘osi ‘a e ngaahi ‘aho mālōlō ‘o e Pekia. Ka neongo ia foki, ‘oku kei hokohoko atu pē ‘a e ngaahi fakataputapuí.
Koia ai, koe ako ‘etau fānau ‘e kei hokohoko atu pē ia ‘i he ‘onilaini (on-line). ‘Oku lolotonga ngāue ‘a e Potungāue Ako mo ‘ene kau ngāue ki hono fokotu’utu’u ‘a e ngaahi founga ‘e lava ke tokoni ki he ako ‘onilaini ‘ae fānaú.
‘Oku ou fakamālō atu kiate kimoutolu kotoa pē ne mou kau mai ki he savea na’e ‘oatu ke fakapapau’i ai ‘a e ngaahi famili ‘oku lava ke ngaue’aki ‘e he fānau ‘a e ‘initaneti ki he ‘enau ako mei ‘apí.
Ko e ngaahi fāmili ko ia ‘oku ‘iai ‘ae ‘initaneti, ‘oku lahi ‘ae ngaahi ngāue fakaako ‘e ma’u atu mei he website moe facebook ‘a e ‘apiako pē.
Ko e ngaahi fāmili ko ia ‘oku ‘ikai ha ‘initanetí, ko e faingamālie lelei ‘eni ke mou ako’i ai ‘ae fānau ke nau lava lelei ke ngāue’aki ‘etau lea faka-Tonga. ‘I he kamata ‘o e teemi hokó, ‘e ako ‘a e fānau ki he ‘Mo’ui lelei’, ko ia ai kātaki ‘o ngāue’aki ‘a e ngaahi faingamālie kotoa pē ke tokoni ki he ‘etau fānau, ke fakalahi ‘enau ‘ilo ki he ngaahi founga ‘o e faka’ehi’ehi mei he mahaki Covid19. ‘Oku mahu’inga foki ke nau ‘ilo koe fakakātoa ‘o e Mo’uilelei ko e mo’ui lelei honau ‘atamai, mo’ui fakasōsiale moe mo’ui fakaēloto, pea mo e mo’ui fakalaumālie.
‘E ‘iai ‘a e polokalama ako ma’ae fānau ‘e toki fakahoko mai ‘i he televīsoné.
‘Oku ou faka’amu ke mou tokanga ’o talangofua ki he ngaahi fakahinohino mo e fale’i mei he Potungāue Mo’ui moe Pule’anga, ko e ‘uhi ke mou hao ai mei he mahaki Covid19. ‘Oku ou ‘amanaki ‘e vave ni pē ha tau toe fakatahataha mai koe fāmili ‘o e ‘Apiako Sātoni Paaka.
‘Okapau ‘oku ke toe fiema’u ha fakaikiiki pē ha tokoni,pe a Kātaki ‘o fetu’utaki mai ki he tu’asila principal@suttonpark.school.nz pe tuku mai ha fekau ‘i he telefoni 021-250-6684 Fakatauange pē ke mou hao mo malu mo homou ngaahi fāmili kotoa ‘i he ‘aofinima’ofá ‘o e ‘Otuá.
‘Ofa lahi atu moe hūfaki,
Fa’atili Iosua Esera
Pulea’oga
